जिमेल, फेसबुक र युट्युब विश्वभरिमा सबैभन्दा बढी डाउनलोड गरिएका एन्ड्रोइड एपमध्ये पर्छन् । यी एप नेपालमा समेत निकै चर्चित भए पनि केही यस्ता एप प्ले स्टोरमा छन् जो नेपालकै लागि भनेर बनाइएका छन् ।

तीमध्ये, प्ले स्टोरकै फ्री एप्सको २०१७को डिसेम्बरको टप चार्टस् सूची अनुसार यी एपहरु नेपालमा निकै चर्चित छन्:

संगीतको एप शीर्ष स्थानमा

योन्डर म्युजिक एनसेल नम्बर भएका ग्राहकका लागि निःशुल्क संगीत सुन्न बनाइएको एप हो । करिब २ करोड नेपाली तथा अन्तर्राष्ट्रिय संगीतको लाइब्रेरी भएको यस एपमा हरेक विधाका गीत सुन्न पाइन्छ । रजिस्टर गर्न एनसेलको नम्बर र एनसेल मोबाइल डाटा अन हुनुपर्ने यस एपमा आफूलाई मन पर्ने कलाकार र उनीहरुको संगीतलाई फलो गर्न पाइन्छ । त्यसका साथै आफूलाई सुन्न मन पर्ने विधाका गीतको प्लेलिस्टलाई फलो वा आफ्नै प्लेलिस्ट बनाउन पनि सकिन्छ ।

चलचित्रको मजा मोबाइलमै

एनसेलले संगीतको मात्र नभई आइफ्लिक्स नामको चलचित्र अनलाइन स्ट्रिम गर्न मिल्ने एपसँग सहकार्य गरेर नेपालमा केही महिनाअघि यो एप भित्र्याएको थियो । अन्तर्राष्ट्रिय बजारमा १ करोडभन्दा माथि डाउनलोड गरिएको आइफ्लिक्स एपमा एनसेल सिम प्रयोग गर्ने ग्राहकलाई तीन महिनाको अनलिमिटेड स्ट्रिमिङको अफर गरिएको छ । तीन महिनाको अफर समाप्त भएपछि एक घन्टा चलचित्र स्ट्रिम गर्न एनसेल डाटा प्याकेजमा ५० रुपैयाँ तिर्नुपर्नेछ । लाखौं अन्तर्राष्ट्रिय चलचित्र र टेलिसिरिजहरु भएको यस एपमा नेपाली चलचित्र हेर्न भने ग्राहकले अझै पर्खिनुपर्नेछ ।

नेपाली टाइप गर्ने किबोर्ड एप

सबै नेपालीलाई मोबाइलमा नेपालीमा टाइप गर्ने आवश्यकता कुनै न कुनै बेलामा पर्न सक्छ । हाम्रो नेपाली किबोर्ड प्रयोग गरेर कुनै पनि एपमा कपी–पेस्टबिना सिधै नेपाली भाषामा टाइप गर्न सकिन्छ भन्ने दावा हाम्रो नेपाली किबोर्डले गर्छ । हाम्रो नेपाली किबोर्ड प्रयोग गरेर अंग्रेजी अक्षरमा नेपाली शब्द टाइप गरेर नेपाली शब्दमा परिवर्तन गर्न सकिन्छ (जस्तै ‘नजबच’ शब्द टाइप गरेर नेपालीमा ‘घर’ आउँछ) वा नेपाली अक्षरहरुमै पनि टाइप गर्न सकिन्छ ।

हाम्रो नेपाली किबोर्ड जस्तै नेपाली किबोर्ड र टाइप नेपाली नामका अरु एप पनि प्लेस्टोरमा भेटिन्छन् । तर टाइप गर्दा अक्षर भेट्न कठिन हुने वा सोझै अरु एपमा नेपालीमा टाइप गर्न नमिल्ने जस्ता गुनासाले गर्दा ती एपहरु हाम्रो नेपाली किबोर्ड जत्तिको चर्चामा नआएका हुन सक्छन् ।

भित्ते पात्रो हातमा

नेपाली क्यालेन्डरको एपमध्ये सबैभन्दा चर्चित हाम्रो पात्रो र नेपाली पात्रो हुन् । हाम्रो नेपाली किबोर्ड बनाउने समूहले निकालेको हाम्रो पात्रो एप श्रेणी २२ मा छ भने नेपाली पात्रो एप श्रेणी २७ मा छ । दुवै पात्रोका एपहरु सुरुमा आउँदा नेपाली भित्तेपात्रोको एप संस्करण भएर सुरु भए पनि पछि आएर विनिमय दर देखाउने, मिति रुपान्तरण गर्ने, राशिफल देखाउने, समाचारका अंशहरु देखाउने जस्ता कयौं फिचरहरु यी एपमा जोडिए ।

बोर्डगेमको एप

नेपालमा निकै लोकप्रिय बोर्डगेममा लुडो एक हुन सक्छ । त्यही बोर्डगेमलाई लुडो नियो–क्लासिक नामको एपमा परिवर्तन गरेर जीवन श्रेष्ठले धेरै नेपालीलाई मनोरन्जन दिएका छन् । लुडो प्रो नामको उही नियम भएको लुडोको अर्को एप पनि प्लेस्टोरमा छ । तर नेपाली ग्राहकले नियो–क्लासिक नै रुचाएको देखिन्छ ।

स्टाटस अपडेट गर्न सोच्नै नपर्ने

फेसबुक वा ट्विटर स्टाटस अपडेट गर्दा अद्वितीय विचार व्यक्त गर्ने चलन धेरै चर्चित भएको कुरा फेसबुक र ट्विटर जस्ता एपको न्युजफिडमा प्रस्ट देख्न पाइन्छ । यही चलनलाई आगो दिने एपमध्ये अहिले गुगल प्लेस्टोरको सूचीमा निकै माथि चढेको एप मन छुने लाइनहरु पनि हो । यस एपमा विभिन्न मार्मिक, दार्शनिक विचार, हाँस्य चुटकिला र मायाप्रेमका मुक्तकहरु प्रशस्त संख्यामा पाइन्छ र यहाँबाट कपी गरेर आफूलाई योग्य लाग्ने ठाउँमा पेस्ट गर्न सकिन्छ । यति मात्र नभई दसैं, तिहार र नयाँ वर्षजस्ता अवसरमा आफ्ना परिवार र प्रियजनलाई शुभकामनाको सन्देश पठाउन पनि यस एपको प्रयोग गर्न सकिन्छ भनेर एपको परिचयको खण्डमा लेखिएको छ ।

टप ५० का अरु केही एप:

गुगल प्लेस्टोरको फ्री एप्स टप चार्टस् श्रेणीमा टप ५० भित्र परेका नेपालकै लागि बनाइएका अरु केही एप यसप्रकार छन्:

• दराज – घरमै बसेर सामान खरिद गर्न सकिने एप
• ३० दिनमा अंग्रेजी फरर – नेपालीमा अनुवाद गरिएका शब्दले अंग्रेजी भाषा सिक्न सजिलो बनाउने एप
• एनटिसी एनसेल स्क्यान टु रिचार्ज– रिचार्ज कार्डको तस्बिर स्क्यान गरेर रिचार्ज गर्ने एप